| تبليغات | X |
|
یاشار جعفر اوغلو انتقادی -اجتماعی-فولکلور
| ||
|
نوروز بایرامی و هیجران داغی (صاباحیمیز(فردای ما) درگی سینین اوزل ساییندا درج اولونموش یازقی) گئجه نین سون چاغلارایدی . سحرین شفقی یاواش- یاواش قارانلیغین بوخجاسین بوکوردو. یئر اوزره سی گئتدیکجه ایشیق لانیردی . پنجره نین دومان باسمیش شوشه سینی بارماقلاریملا سیلیب ائشییه باخدیم. هاوانین چم لیغی بوداقلارین اوستونده شئح مونجوغو یاراتمشیدی . بیر آز گؤزلریمی یوخاری یا قالدیردیم. حه یه ط دیوارینین قیرناسیندان، ذیروه سی قارلی داغا گؤزوم ساتاشدی. گون یاواش یاواش ایشیغینی یئر اوزه رینه ساچیردی . داغین چئوره سینده کی گؤیون اوزو سویوقدان قیزارمیش اوشاق اوزوکیمی آل – قیرمیزی اولموشدو . گئت به گئت گونون شفقی داغین آرخاسیندان یئر اوزه رینه یاییلیردی ، بیر نئچه ساهات ایل تحویلینه قالمامیشدی یعنی 1391- جی ایلین یئتیرمه سینه. قولاغیم سس ده ایدی . آخی ائله اوگئجه یوخودا گؤرموشدوم . بیر آغ آتا مینیب، آغ- آبباق پالتار اگنینده و قارا رنگ لی یان قیلیجی شاپکا باشیندا منه قارشی گلیردی . سانیردیم گرچک دی . سئوینجدن گؤزلریمین گؤز یاشلاری دامجی دامجی یاناقلاریمدان آخیردی و دوداقلاریمین قیراغیندان دئمه یاسدیغین اوزه رینه تؤکولوردو. بیر آن یوخودان آییلدیم. گؤزلریمی سیلیب دیواردان آسیلان ساهاتا باخدیم. گئجه نین بیر یاریسین گؤستریردی . سحر واختینا ائله قالمامیشدی. یاتابیلمه دیم . اوتوردوم دیزلریمی قوجاقلادیم. گؤزلریم دیوارداکی شکیلین گؤزلرینه ساتاشدی. سانکی اونون داگؤزلری منیم گؤزلریمه باخیردی. نیسگیل لی بیر باخیش. باخیشلاریندا بیر دونیا معنا قالانمیشدی و گؤردویوم یوخونو بیر داها خاطیرلادیم ، اوره ییم دیلیمدن قاباق دیله گلیب سیزلی یا ، سیزلی یا سؤیله ییردی هارداسان ؟ ندن منی یالنیز بوراخیب گئتدین؟ من سندن دویمادان، نه تئزمندن دویدون ؟ مه یه قرار دئییلدی منه دایاق اولاسان ؟ الیمدن یاپیشیب، ییخیلماقدان قورویاسان؟ اولمایا فلک سندن دویموشدو؟... آرزیلادیم بیر بیر گؤزومدن اؤنوندن صفه دوزولوب رژه گئدیردیلر. کیرپیک لریم گؤزلری مین دامجی لارینی سیخیب، یاناقلاریمدان بیلک لریمین اوزه رینه آخدیریردی . کئچن گونلریم یادیما دوشدو. ان اوشاقلیق خاطیره لریم. ائله بیل ائله دونن ایدی. بالاجا ائویمیزین قاپیسی دؤیونن زامان، گؤزله مه دن، قاپی یا ساری، قوش گئدیردیم. قاپینی آچارکن اؤزومو آتیردیم اونون مهربان قوجاغینا. گولر اوزله یورولموش قول لارینی منیم بوینوما حلقه ائدیردی باغرینا باسیردی. سویوق دوداقلاری لا یاناقلاریمدا، اوپوش چیچه یی اکیردی . آتالیق دویغوسو ائله بیله ایمیش. بو دویغونو دریندن حیسّ ائدیب آنلی ییردیم . آی آللاه دونیانین ان سئویملی آتاسی ائله منیم آتام ایدی . هئی .... اوگونلر نه تئز کئچدی ، گئتدی. من بؤیودوکجه آتام دا یاشلانیردی. زمانین چیلغین – چیلغین آغیرلیغی گوجلوآتامین بئلین بورکموشدو. زمانه نین آغیر دردی و گرگین دورومو آتامین ساچلارینی قیش قاری کیمی آغارتمیشدی . سانکی بو آغاریلمیش ساچلار، اونون هیجران نغمه سینی، سسلندیریردی . گونلر، آیلار کئچیردی، ایللر بیتیردی ، آتامین اللری نین اوستونده کی دری لرگون به گون قیریشیردی ، دری نین آلتینداکی یاشیل دامارلار گؤزه چارپیردی . اللری نین ایچی ده، قابار باغلاییب دریسی قات – قات بیر بیریندن آیریلانیردی و بوندان دولایی هر گون قئوریشیردی ، کاسیب لیق بئلینی بورکموشدو و قیافه سی سیندیندن ایره لی گؤرسه نیردی . بیرگون ، بیرگون پاییزین ایلک آیی نین ایلک گونلرینده اورتا مکتب دن ائوه ساری قاییدیردیم . کوچه یه گیرن زامان بیر آن شوبهه لی منظره یه گؤزوم ساتاشدی. گؤردوم کوچه نین ائنی – اوزونو، قوهوم – قونشوی لا دولوب . ایلاهی ندن بیر بئله جماعت بیزیم کوچه یه یئغئشیبلار؟ اولمایا.... یوخ دیلیم لال.... آمما ائله بیل بو جماعت بیزیم ائویمیزین قاپیسینا توپلاشیب لار. اوره ییم اوزولدو... آی آللاهیم نه اوز وئریب ؟ نه اولوب ؟ اولمایا خسته آتاما بیر زاد اولوب؟ آخی اوتن گئجه آتامین دورومو یاخشی دئییلدی... خسته آتاما، آنام قند شربتی حاضیرلاییب وئرمیشدی... آتامین رنگی سارالمیشدی و دردین گوجلوغونودن باغیریردی . آتامین حزین حزین سسینه یوخودان آییلدیم. گؤردوم آنامین بیر قولو آتامین باشینین آلتیندا و بیر قولویلا دا اونا شربت ایچیردیر. آتامین بئحال گؤزلری منه ساتاشدی. قیزیم نیگران اولما منیم هئچ نه ییم دئییل. گئت یئرینده یات. سحری مدرسه ن بئواختا قالار دییه ر کن منی موتلو ائدیردی.بیلمیردیم آتامین خسته لیغی ندن دیر؟ آمما نییه دوقتور دئمیشدی، اونون اوره ک خسته لیغی وارایدی . آمما آخی اونون پاک اوره یی ندن خسته لنه؟ بیلمیردیم باشیمدا چیخمیردی . آخی یاشیمدا اوقدر دئییلدی کی دوقتور دئدی یینی آنلی یام. سونرالار بیلدیم کی آتامین سرطان خسته لیغی واریمیش. کاسیب لیغین اوزو قارا اولسون. پولوموز اولمادان، آتام خسته لیغین قارشی سیندا داوام گتیرمه ییب دئمک دونیاسین دئییشمیشدی. نه ایسه قاپی نین اؤنونده دوردوم ایچه ری گیره بیلمدیم یعنی آیاقلاریمدا طاقت قالمامیشدی. آنام تورپاقلاری باشینا سپیردی .... ای وای ائویم یئخیلدی آللاه ، باشیما کول اولدوآللاه دئییردی. عزالی آنام یانیق یانیق آغلاییردی. گؤزلری منه ساتاشارکن داهادا آرتیق دویغولاندی و سسینی قالدیردی .... چانتام الیمدن اوزولوب یئره دوشدو.... بیر بوز قندیلی کیمی یئریمده دؤندوم، بئینیم ایشدن دوشدو. اوره ییم چیرپینماقدان دایاندی ، قوللاریم سینیق بوداق کیمی چینیمدن آسلاندی . دیلیم توتولدو... یازیق اولان منم آللاه؟ ائوی ییخیلان منم آللاه؟ آتام الیمدن گئتدی ....؟ آنام منه قارشی گلیب منی باغرینا باسدی ، آتان الیمیزدن گئتدی قیزیم دئدی . اومودوموز کسیلدی! آنامین گؤز یاشلاری مدرسه دونومو ایسلادیردی . ایکی قولومو آنامین بوینونا حلقه ائله دیم گؤزلریم سانکی یاز بولودو اولموشدو . آنام آغلارکن اوخشاییردی ، من ده یانیق یانیق آغلاییردیم . آتاجان قوربانین اولایدیم . آتاجان قاباریلمیش اللرینه قوربان اولایدیم .... گؤزلری نین قوربان اولایدیم . یارالی و خسته اوره یی یین قوربانی اولایدیم . ندن بیزی یالنیز بوراخدین گئتدین ؟ نئجه آتاسیز دؤزوم؟ کاش سنین یئرینه من اؤله ایدیم .... بو حال دا قونشولار و قوهوم لار، آتامی قارا پتویا بورویوب قاپیدا ساخلانمیش آمبولانسین ایچینه آپاریردیلار. اؤزومو آنامدان آییردیم آتامین جنازه سی نین آرخاسی جا قاچدیم. هارا آپاریرسیز؟ من ده آتام لا گئدیرم دئدیم. قوهوم – قونشو منی آتامین روح سوز بدنیندن آییردیرلار . آندا وئردیم، قویون لا اقل بیر دفه یالنیز بیر دفه گولر اوزلو آتامین چؤهره سینه باخیم و دوداقلاریندان اؤپوم... دوداقلاریمی قویدوم سویوق دوداقلاری نین اوستونه، اللریمی سولموش یاناقلاری نا چکدیم. بو منیم سون گؤروشوم اویدو. بیلیردیم بوندان بری آتام خروار – خروار تورپاقلارین آلتیندا یاتیب و دینجه له جک و من گؤره بیلمه یه جم. اؤپدوم ، یاناقلاریندان ، گؤزلریندن و قیریشمیش آنلیندان اوپوردوم ، آغلاییردیم. قوهوملار قوللاریمدان توتوب کنارا چکدیلر. اینانمیردیم . سانکی بیر یوخواویدو، بیر خیال ، بیر رؤیا . آمما نئچه گوندن سونرا بیلدیم کی گرچک ایدی . آتامین اؤلومو دوغرویموش هه یه . من آتاسیز قالدیم. آتاسیزلیق دهشتلی بیر درد . آتاسیزلیق ، یالنیز لیق دیر. آتاسیزلیق ، دیرکسیزلیق دیر. آتا یعنی سئوگی، آتا یعنی ایستک ، آتا یعنی قیزین دایاغی، آتا یعنی قیزین دیره یی . آخی او منیم گوجلو دیره ییمی دی. نه منیم ، ائله آنامین دا. هیجران اودو تام وجودومو آلیشدیردی . هیجران دردی یامان درددی . چاره سیز درد . آمما حه له ده اینانا بیلمیرم کی آتام دونیاسین ترک ائدیب دی . ائله یئنه ده قولاغیم سس ده . ائله دئییرم آتام قاپینی دؤیوب بیرده ائوه دؤنه جک. آتامین بیرده یورقون حال لی آمما گولر اوزولو چؤهره سینی گؤره جه یه م . منی یئنه ده باغرینا باسیب اؤپه جک دیر. دویغولارینی تام وجودوم لا حیسّ ائده جه یم... هر ایلین سونوندا و یئنی ایل تحویل اولاندان سونرا اوره ییم چیرپینیر، آنامدان گیزلین گئدیرم اؤز اوتاغیمدا دیزلریمی قوجاق لاییب آتامین شکلینه باخیب خیسین خیسین آغلاییرام، اؤز اؤزومه دئیرم نه اولاردی منیم آتام دا کناریمیزدا اولاردی ، منه بایرام پالتاری آلاردی . چارشنبه آخشامی اود تونقارلاییب اودون اوستوندن آتیلاردیق ، بیرلیکده گئدیب ایکی جوت قیرمیزی بالاجا بالیق آلیب شوشه تونگه سالاردیق، بایرام گونو منی باغرینا باسیب بایرام لیق وئرردی . بیلیرسن آتاجان نئچه گون بوندان اؤنجه چارشنبه آخشامی یئر گؤی تام ایشقلیق ایدی. قونشولاریمیز اود تونقارلامیشدیلار . اودون اوستوندن آتیلیب و شادلیق ائدیب دئییردیلر : آتیل باتیل چارشنبه باختیم آچیل چارشنبه . آمما من قارانلیق اوتاغیمدان ائشییه چیخمادیم. آخی سنسیز نئجه شادلیق ائدردیم؟ هانسی بختیم آچیلاردی؟ یئنه ده آغلادیم ... ثانیه لر هر بیریسی منه بیر ایل گلیر. ایندی ایسه هر زمان ایل بایرامی گلیر، اوره ییم دؤیونور، سیخیلیر، داریخیرچونکو بایرامین داخی منه معناسی یوخدور . هر زامان یاز فصلی منه پاییزدیر. آخی بیلیرسیز آتامی سون بهاردا الدن وئردیم . خزان یئلی آتامین عؤمرونو الیندن آلدی . ان دوغروسو منیم الیمدن آلدی. گؤزلریم یئنه ده قاپی نین اؤنون ده دیر هر آن قاپی نین سسینی اؤزلویرم و آتامین گلمه سینی گؤزلویرم. ایندی ده گؤزوم قاپینین آرخاسیندادیر بیلیرم کی بیرنئچه ساهات دان سونرا، ایل ته زه له نه جک دیر یعنی ساهات 45/8 دقیقه ده . گؤزوم گؤزونو گؤزله ییر، آتاجان هارداسان گل ... آتا جان هارداسان گل... هیجران اودو منی آلیشدیردی هارداسان گل آتاجان ... هارداسان گل .... [ جمعه بیست و ششم اسفند 1390 ] [ 18:56 ] [ یاشار جعفر اوغلو ]
سولدوز شهرینده قاراپاپاقلارین نوروز بایرام شنلیک لری (بو یازقی اورمودا یاییلان شهامت درگی سینین اوزل بایرام ساییندا درج اولونوبدور) سولدوز شهری باتی آذربایجانین تاریخی و ان گؤرکملی بؤلگه لریندن بیری دیر و سؤزسوز کی رحمتلیک شهید چمران دئمه لی آذربایجانین دروازه سی سایئلیر. بو شهرده یوزه هشتاد خالقی تورک و قاراپاپاق ائلی دیر و باشقا ائللر و طایفالاردا سئوگی و سایقی لا یاشاییرلار. سولدوز اهالیسی و اؤزللیک له قاراپاپاقلاری بیر آی یاز فصلینه قالان یعنی ایسفند آییندا اؤزلرینی نوروز بایرامی نا حاضیرلاییر لار. «حیس آلماق» اونلار هر بیر زاد دان اؤنجه «حیس آلماق» رسمینی یئرینه گتیریب و بو فعالیّتده ائوده اولان فرش لری ، یاتاق پالتارلاری، یاستیق – بالیش و موتکّا ، پتو و باشقا زادلاری یویوب و لکه لردن تمییزله یرلر. البته بوندان اوّل اونلاری شهر و کندلرده یئرلشمیش چای کنارلاریندا یویاردیلار، آمما ایندی ایسه ائولرین حیه طینده و یا فرش یویان کارخانالاردا بو ایش انجام تاپیر. بو ایش له برابر ائوین دیوارلاری ، قاپی – پنجره لری و باشقا یئرلری تمیزله نیر و بئله لیک له ائولر اؤز دیلیمیز بیر دسته گول کیمی بزه نیر. « گؤی گؤورتمک یا گؤی قویماق » ایکینجی ایش « گؤی گؤورتمک یا گؤی قویماق » ایشیدیر. بوغدا،آرپا،نوخود،مرجیمک،بزره ک و باشقا توخوملاری آیری آیری دسمالا تؤکوب نئچه گون یاش و نمیش ساخلایاندان سونرا اؤزل بوشقابلارا و هردن ده سلیقه وئریب گلینجیک و یا کوزه لره یاخیب، ایستی یئرده ساخلاییب و گونده سو وئرمک و یا سو سپمک له اونلاری گؤوردیرلر. دئمه لی یم ، او ائولرده کی توی قراری وئریلیب و قراردی گلین گلسین یا آپاریلسین بوندان دولایی گؤیلر داهادا آرتیق بزه نیر و سلیقه وئریلیر. ها بئله او عائیله لرکی یاخین عزیزلرین الدن وئریبلر ایلک ایل دؤنومو یئتیرمه میشدن گؤی بئجرمزلر ، آمما ایکینجی ایلده اونلاردا گؤی گؤوردیب و عزیزلرینین مزارینا آپارارلار. «بالاجا قیرمیزی بالیق» آلماق و تونگه سالیب و گؤوه رن گؤیون کنارینا قویماق دیگر فعالیّت لردن دیر. « پای آپارماق» اوچونجو عادت و عنعنه لردن کی سولدوز ماحالیندا گئنیش سوییه ده دیه ر وئریلیر« پای آپارماق» عنعنه سی دیر. بو عنعنه ده بایرام یئتیشمه میشدن اؤنجه ، عائیله لریاخین عزیزلرینه یعنی قیز ، اوغلان و ها بئله باجی لارا و قارداشلارا گلین و یئزنه یه، پارچا یا پالتار و یا باشقا شئی لری پای عونوانی ایله آلیب و بیر قوطو شیرینی ایله گؤندریب و پای صاحابی دا بیر جوت جوراب یا پول یا دا باشقا بیر شئی پای آپارانا هدیه وئررلر. بو عنعنه نین ان اؤنملی سی و گؤزه گلیمی ته زه گلین اولان ائولرله ایلگیلی دیر. سولدوزدا قدیمدن رسمی دیر کی ته زه گلینه، هم اوغلان طرفیندن و هم ده اونون آتا-آناسی و قوهوم لارینین طرفیندن چئشیدلی بایرام پایی آلینیر و ایلین آخیر چرشنبه سینده اونا ایتحاف اولونور. البته بو گونده گلینین ائوینده ده شادلیق ائدیب و شیرین بیر خاطیره یارانیر.ایضاح ائتمه لی یم کی بو طنطنه لی رسم گلینین ایلک نوروز بایرامیندا یئرینه گتریلیر. «تک» یا ایلین «آخیر سه شنبه» «تک» یا ایلین «آخیر سه شنبه» رسیمی ده دونیادان گئدنلره عایید دیر. بو گونده سولدوز اهالی سی شهر وکندلرده قبیراوستونه گئدیب و گؤوه رن گؤیلری دونیادان کؤچوموش عزیزلزینین مزار لاری اوستونه قویوب و حالوا ، خورما ، شاقالات و باشقا یئمه لی خورک لر پایلاییب و بونلاری آلانلاردا دونیادان گئدنلره فاتیحه اوخویوب تانریدان رحمت و باغیش ایسترلر. «کؤهنه سویا چیخماق» «کؤهنه سویا چیخماق» ایل تحولیندن قاباق دیگر عنعنه لردن دی کی قاراپاپاق ائلینده اؤزل یئری وار. «چارشنبه آخشامی» ، «باجا باجا یا شال ساللاما» ،«قولاق آسماق» ، «بعضی کندلرده تکه چیخارتماق»،«یومورتا دؤیوشدورمک» ،«فالا باخماق اودا گؤوه ریلن گؤی ایله» باشقا عنعنه لردن دیرکی سولدوزدا ایفا اولونور. « کؤهنه سویا چیخماق» و« ته زه سو اوستونه گئتمک» نوروز بایرامی نین ان کوتله وی و دیه رلی ععنعنه سی سایلیر. بو تؤرن ده ایلین آخیر سه شنبه سی و ته زه ایلین ایلک گونونون باشلانقیجیندا یعنی سحر چاغی نین اوّل ساهاتلاریندا کی حه له گون اؤز ساچاقلارینی یئرین اوزرینه سره لندیرمه ییب ، سولدوزون بوتون اهالی سی اولسون آغ ساققالی و آغ بیرچه یی ، اوشاقلاری اوفاقلاری، قیزلاری و اوغلانلاری و اؤزللیک له آداخلانان قیز اوغلانلاری و ته زه توی ائدن گلین و دامادلاری بیر اللرینده سه نه ک یا کوزه و بیر اللرینده یئر-یئمه لی و باشقا شئی لر شهرین قیراغیندا یئرلشن گادار چایی و کندلرده ده یئرلشن آخار چایلارین کنارینا گئدیب ال و اوزلرینی چایین سویو ایله یویوب اود یاندیریب و شادلیق ائدرلر. اونلار همچنین الکوللو پامبیغی جه ویز قابیغی ایچرسینده یاندیریب و آخار سویون اوزه رینه بوراخیب و سویون جریانینا و دالغاسینا تاپشیرارلار.چایین باشا باشیندا بو عنعنه نی یئرینه گتیرمک گرچکدن گؤزل و بدیعی منظره یارانیر. «چارشنبه سوری یا چارشنبه آخشامی» «چارشنبه سوری یا چارشنبه آخشامی» ایرانین باشا باشا ایله بیر زاماندا سولدوز شهرینده و کندلرینده ده دیه ر وئریلیر. ایلین آخیر سه شنبه سی کی سولدوز خالقی ایچینده «تک گونو» آدلانیر گون باتاندان سونرا کوچه لرده ، حه یه ط لرده و چؤل لرده اودون حاضیرلاییب یاندیریب و تونقارلایاندان سونرا قیزلی – اوغلانلی ، بؤیوک لو – کیچیک لی اوتون اوستوندن آتیلارکن سؤیله یرلر: آتیل – باتیل چارشنبه بختیم آچیل چارشنبه بو عنعنه نین آردی سیندا گئجه چاغی «چارشنبه یئریئملی» لری کی عیبارتدی آجیل، نوخود کیشمیش، جه ویز ، بادام ، چئشیدلی میوه کی اؤنجه دن آلیب و حاضیرلامیشلار سوفره اوزه رینه دوزوب ، یئییب و شادلیق ائدرلر. «باجا باجا » ائله بو گئجه ده «باجا باجا » عنعنه سی ده یئرینه گتیریلیر.ندن باجاباجا دئییلیر؟ بونا گؤره کی قدیم زامانلاردا ائو داملارینین اوزه رینده - کی «ال دامی» دا آدلاناردی- باجا اولاردی و گونون ایشیغی بو باجادان ایچری دوشوب و او طرفدن ده ائوین هاواسی و یا تندیرین توستوسوده بو باجادان ائشییه گئدردی . قدیم زامانلاردا چارشنبه آخشامی ائله بو باجانین طریقی ایله جاوانلار و اوشاقلار شاللاری ایچری سالیب و ائو صاحابی دا بیر میقدار یئملی لردن بو شالین ایچریسینه توکوب و دییه ردیلر: شال صاحابی شالیین چک یوخاری. نئجه کی رحمت لیک خالق شاعیری اوستاد شهریاردا حیدربابا منظومه سینده گؤزل شکیل ده بونا ایشاره ائدیبدی. چاغداشدا دوزدو قدیم کی کیمی داملارین باجاسی یوخدو آمما سولدوزدا بو عنعنه حه له ده باجاباجایا مشهوردو و بو گئجه ده ان چوخو اوشاقلار یادا یوخسول عائیله لر ائولرین قاپیسینی چالیب و پای ایسترلر . «قولاق آسماق» «قولاق آسماق» بو گئجه نین باشقا رسملریندن سایئلیر. ائولرده بعضی اوشاقلار و اکثر قیزلار، قونشولار بیلمه دن اونلارین قاپیلارینین آرخاسیندا دوروب یادا داملارینین اوستونه گئدیب و گیزلیجه اونلارین دانیشیقلارینا قولاق آسیب و ایلک جومله لری ائشیدیب یادلاریندا ساخلاییب و اؤز گله جک لرینی او سؤزلر ایله یاناشدیریب و تعبیر ائدرلر. «یئددی سین سوفره سی » ایندی ایسه گلیریک ایل تحویلی رسم لرینه .ایل تحویلیندن قاباق ائوین قادینی یا قیزلاری بایرام سوفره سینی بزه ییرلر. یئددی »س» لا باشلانان شئیلری کی عیبارتدی: سوماق،سیرکه،سمنی،سو، سیکّه، سبزه، ساریمساق ، سوفره یه دوزوب و اونلاردان علاوه چئشیدلی میوه ، آجیل ، شیرنیّات، نوخود-کیشمیش، محلی آجیل ، آینا و نهایت ده تانرینین بیزلره گؤندرمیش قورآن کیتابی دا سوفره یه قویارلار. ایل تحویلی چاغیندا عائیله اهلی بزنمیش سوفره نین دؤوره سینده اوتورارکن ایل تحویلینین ثانیه لرینی گؤزلرلر.ائله کی ایل تحویل اولدو ائوین بؤیوگو بیر نئچه آیه قورآن و سونرادا ایل تحویلینین اؤزل دوعاسین اوخویوب و بایرامی تبریک دئییر.ائوین اهالی سی ده آتایو آنا و سایر له بایرام لاشیب و ائوین بؤیوگو هامی یا جان ساغلیغی و ایل بویو شادلیق آرزیلاییب و بایراملیقلاری ائو اهالیسی و اؤزللیک له اوشاقلارین آراسیندا پایلاییر. «سویا چیخماق» نئجه کی اؤنجه ده ایضاح ائتدیم« سویاچیخماق» کؤهنه ایلین آخیر چارشنبه سینین اؤزل عنعنه لریندن دیر کی بو رسم ته زه ایلده ده عینا" تیکرار اولونور. ائله کی ته زه ایل تحویل اولوندو سولدوزدا رسمی دیر ایلین اوّل گونونون سحر چاغیندا یا ناهاردان قاباق سولدوز خالقی مچیدلره یادا ائولره گئدیب یاسلی عائیله لر یا خود عزیزلرین الدن وئرمیش عائیله لره باش ساغلیغی وئریب اونلارا تانریدان دؤزوم و دونیادان کؤچموشلرینه باغیش ایسته ییرلر. « بایرام لاشما » ناهاردان سونرادا « بایرام لاشما » تؤره نی یئرینه گتیریلیر و بو گل – گئت نئچه گون آردیسی اولار تا کی سیزده گونو یئتیرر. «فالا باخماق» اؤزللیک له گنج قیزلار بیر یئره یئغیشیب و گؤوه رن گؤیون بیر سیرا اوجلارینی قیچی ایله کسیب و اللرینین اووجوندا سایارکن بیر بیرلرینین گله جکلرینی و یا آرزیلارینی تعبیر ائدرلر. «یومورتا دؤیوشدورمه» «یومورتا دؤیوشدورمه» ده بایرامین ایلک گونونده ایفا اولونار و بو قدیمی اویوندا سوغان یا دیگر مادّه لرله بویانمیش و پیشمیش یومورتالار یاریشمایا اوخشاردا کلّه – کلّه یه یا باش باشا و هابئله محلی اصطیلاح کونه – کونه یه چالیب و هرکسین یومورتاسی سینسا او اویونو اودوزور و یومورتانی الدن وئریر. «چؤله چیخماق» «چؤله چیخماق» عنعنه سی بایرام شنلی یی نین سون تؤره نی دیر. بو گون بایرامین اون اوچونجو گونو ایله برابردیر. بو گونده سولدوز خالقی ایرانین باشاباشا ایله بیرلیکده طبیعته و چؤله چیخیب و سحردن آخشاما چن اگله نیب و تفریح ائدرلر. یئددی گؤز، سولطان یعقوب، بابا حسن ، فیرنگی داغلاری و میرآوا خرمنی و ها بئله قاسیملو دره سی و باشقا باغ- باخجا و چؤللر سولدوز اهالی سینین اگلنجه لی یئرلری ساییلیر . بو گونده دویو – خوروش یا کاباب خورکلرین جیواریندا آیران آشی اودا ته زه گؤورن بیتکی لرله پیشیرمک سولدوز قادینلاری نین اؤزل و اؤنملی قیدا حاضیرلاماق ایشلریندن سایلیر. ائله کی بو گون و بو عنعنه ده باشا چاتدی اونون سحری سیندن عادی یاشام یئنی دن باشلانیر . تانریدان سولدوز خالقی لا تام ایران خالقینا دا یاخشی ایل، یاخشی گله جک ، شادلیق ، ساغلاملیق و باشاریلار دیله ییرک. هر گونونوز بایرام و هر بایرامینیز قوتلو اولسون.
اسفندیار سپهری نیا [ جمعه بیست و ششم اسفند 1390 ] [ 18:52 ] [ یاشار جعفر اوغلو ]
اود یانسین اوره ک ایشیقلانسین غم سیلینسین سئوینج بیلین سین چارشنبه آخشامی تورک خالقینا اوزللیک له آذربایجان خالقینا قوتلو اولسون. [ سه شنبه بیست و سوم اسفند 1390 ] [ 0:57 ] [ یاشار جعفر اوغلو ]
آللاهیم بیر یول آچ سن بو سولدوزا
ائله بیل سولدوزون بختی باغلانیب اوره یی نیسگیلدن درددن داغلانیب ایش بیلمز الیندن دالی ساخلانیب آللاهیم بیر یول آچ سن بو سولدوزا
سولدوزون ندن دیر کدرلی یاشار؟ قوصّه سی – غملری باشلاردان آشار؟ یاراسی – حیرمانی اؤلچودن داشار؟ آللاهیم بیر یول آچ سن بو سولدوزا
سولدوزون داغلاری باشی قارلی دیر خالقی نین سینه سی کؤنلو داغلی دیر گؤزلری یاشلی دی قولو باغلی دیر آللاهیم بیر یول آچ سن بو سولدوزا
سولدوزون هاواسی سویو سؤنوبدور یام یاشیل چؤللری گؤلو سولوبدور یارپاغی بوداغی کؤکو دونوبدور آللاهیم بیر یول آچ سن بو سولدوزا
سولدوزون هایی نا قالان هاردادی؟ پاسلانان دردینه چاتان هاردادی؟ الیندن یاپئشان توتان هاردادی؟ آللاهیم بیر یول آچ سن بو سولدوزا
سولدوزون گئجه سی – گونو غملی دیر نغمه سی – نواسی سؤزو غملی دیر هم قئشی هم یایی – یازی غملی دیر آللاهیم بیر یول آچ سن بو سولدوزا
سولدوزون گونلری سیاه قارادیر روانی خسته دی جیسمی یارادیر نا نجیب دوشمنلر اولای یارادیر آللاهیم بیر یول آچ سن بو سولدوزا
سولدوزون ایشیقلی ساهات چاغی یوخ پارلاقلی گونشی سماسیندا یوخ موتلولوق ،دیل خوشلوق جیواریندا یوخ آللاهیم بیر یول آچ سن بو سولدوزا
سولدوزون قیزیل تک یوردو باغی وار قئیرت لی شرف لی ائل اوشاغی وار ائشیتمز سوروملو گؤز- قولاغی وار آللاهیم بیر یول آچ سن بو سولدوزا
سولدوزون شنلی یی الدن گئدیبدیر قاداسی – بالاسی حددن گئچیبدبر نقدر اوغلان – قیز الدن وئریبدیر آللاهیم بیر یول آچ سن بوسولدوزا
سولدوزون کئچمیشی غم دیر – کدردیر ساغ – سولو اولای دیر خطر دی شردیر یاردیملیق اولمورسا دئمک هدردیر آللاهیم بیر یول آچ سن بو سولدوزا
سولدوزون ذره جه یوخدو گوناهی توتاجاق ظالمین یاخاسین آهی تک سن سن ایلاهی اونون پناهی آللاهیم بیر یول آچ سن بو سولدوزا
سولدوزون باشیندا مین بیر اولای وار خالقینین ایچینده یاخشی – قولای وار دوشماندان یارانان چوخلو اولای وار آللاهیم بیر یول آچ سن بو سولدوزا
سولدوزون قوصه سی آغیر بیر یوکدو بارماقدان چیخمایان قاشلی اوزوکدو دردی نین ساحیلی گئنیش بؤیوکدو آللاهیم بیر یول آچ سن بو سولدوزا
سولدوزون غمیندن سولوب سولموشام نیسگیللی دردیندن سولغون اولموشام یانیقلی حالیندان اؤزگون اولموشام آللاهیم بیر یول آچ سن بو سولدوزا
اسفندیارسپهری(موتلو)10/9/1390 [ جمعه پنجم اسفند 1390 ] [ 20:14 ] [ یاشار جعفر اوغلو ]
سولدوزو تانیش ائدیم من ائللره تا کی اولسون یاخشی ازبر دیللره سولدوزون واردی گؤزل داغ دره سی یایلاغی هم قیشلاغی بال بلله سی یام یاشیل داغلیق چؤلو باغ باغجاسی بوللو سوللو میوه سی ال خالچاسی شار ها شار قالخیب داشیر آرخی چایی یوخدور اصلا اونلارا یئرده تایی یئددی گؤز تک داغی وار سولطانی وار چوخ ماراقلی اینسانی قولخانی وار عالیمی چوخدور دیله گلمز هله آشیقی چوخدور هله گلمز اله بورچالی طایفاسی دی اصلی کؤکو هم موباریز هم شرف قئیرت یوکو شاعیری هم عاریفی چوخدور اونون آشیغی صنعت چی سی بولدور اونون بیر بیره داغلار کیمی قول دور اولار قالتاغا ساتقینچی یا قوشدور اولار داغچیسی قایقچی سی باش تاجی دی هاکی سی اوستون اولان باش تاجی دی ان قوچاق اینسانی وار هر ریشته ده علم ده ایدمان دا هم دین ریشته ده سولدوزون واردی گؤزل کندی چؤلو آرخی چایی قوبوسو چوخلو گؤلو کندلری بیر بیر ساییم ائلدن ائله تا کی دوشسون شوکتی دیلدن دیله تازه کند و تابیه گلوان آدا تازه قلعه قلعه جوق کاروان سارا یئدی یارلی دربسر دورگه دیزه داشکسن اوخسار دمیرچی کهریزه خلفه لی حیدرآباد به ییم قالا حاج باغلی گؤرناوا بایرام بوغا گیرده قیط وزنه خلیفان و تپه گؤل کووول آغجازیوه ساخسی تپه فرقوزاد و میرآباد و داشخانا حلبی و آرنا امینلی گؤرخانا چی یه نه قارنا بالیخچی شه وله حاجی فیروز ممه لی دشته قوره آل ملیح ایسلام آوا شیطان آوا قره قصّب خین خینا توپبوزآوا قالالار شیروان شاهلی دؤولت آباد رخدهنه شیرین بولاخ بهرام آباد آغابی لی ممّدیار و طالقان ماسوه دربد شیخ احمد جاشیران آلاگؤز سارال جالال خان کندی وار اسکی تاریخلی حسنلی کندی وار لاواشلی آغ توولاسی نیظام وادی عجملی المهدی سی دربندی وار بئچنلی دوست محله سی گؤزایرانی شونقاری کؤپک لی سی دایماوی وار بارانلی مهمانداری ممّدشاهی تلووو کؤویک کاموس دلمه سی وار دیلنچی آرخی همی داش دورگه سی قجردن کؤرپو قالان ممیندی وار هابئله داغی قوبوسو گؤلو وار یئدی یار ، حسنلی آددا گؤلو وار گیرده قیط جهودآباد شیطان آباد سولدوزون بئله سولو گؤللری وار بؤلگه مین اطرافیندا وار تپه سی تپه لرین اؤنمی اسکی حسنلی تپه سی حاجی فیروز تپه سی بیرده دئییم ساخسی تپه بئله قیمتلی تپه گلمز اله سولدوزون عنعنه لی شنلیی وار ماراقلی طنطنه لی توی رسمی وار چیلله سی نمازلیغی چرشنبه سی هابئله یاس تؤره نی پنشنبه سی تویلاری غایت گؤزل ماراقلی دی ان اؤزل دبی اویناماغی و یاللی دی چئشیدلی هفته بویو آلیش وئریش سولدوزدا ممّدیاردا وار بازاری آردی سی وار....
[ یکشنبه بیست و سوم بهمن 1390 ] [ 0:34 ] [ یاشار جعفر اوغلو ]
قوربان ائیلرم... سن وفالی سئوگی یه من جانی قوربان ائیلرم کوی عشقینده گزیب یوز جانی قوربان ائیلرم چشم مخمورین منی سورگون ائدیبدیر چؤللره وصل اوچون جانا سنه من عؤمرو قوربان ائیلرم عاشقم کویینده بیرمجنون کیمی واردیر دؤزوم لیلی تک عشقین یولوندا جانی قوربان ائیلرم شؤعله عشقینده یاننام بیر دلی پروانه تک قول- قانادیم یانسادا من روحو قوربان ائیلرم درد و محنت دن اوزاق اول من دایانمام دردینه دردینه درمان اولارکن جانی قوربان ائیلرم ایلقاریم آندیم بودورهئچ ال گؤتورمم سئوگی دن گر اولا سایسیز جانیم جانلاری قوربان ائیلرم یاندی عشقین آتشینده اولدو بیریان وارلیغیم وورغونام جانا یولوندا جیسمی قوربان ائیلرم طاقتیم یوخدور فراقه لایق وصلم اگر موتلویام امرائیله بیر آن جانی قوربان ائیلرم
13/10/1390 اسفندیار سپهری (موتلو)
[ سه شنبه بیستم دی 1390 ] [ 18:57 ] [ یاشار جعفر اوغلو ]
چیلله گئجه سی
چیلله گئجه سی گلدی یئنه قار یادا دوشدو یای فصلیده کی قیرمیزی قارپیز یادا دوشدو
ائللر یئغیشار بیر یئره تا چیلله گیررکن ائولرده کی ان یئریئمه لی لر یادا دوشدو
کورسو باشیدی قیرمیزی قارپیز بزه نیبدی جؤز حالواسی کیشمیشلی نوخود دا یادا دوشدو
قارپیز کسیلیب حالوا گلیب نار دنه لندی دارچین چایی دا قیش گئجه سینده یادا دوشدو
شانلی گئجه دیر بوزلو سویوخ قارلی هاوادیر تندیرده بیشن ایستی پازی دا یادا دوشدو
سوفره بزه نیب قیز گلین اوغلان کناریندا رحمتلی سئویملی آتامیزدا یادا دوشدو
حیدربابانین نغمه سی سازی بایاتیسی چیلله گئجه سی سئومه لی شعری یادا دوشدو
یای گئتدی پاییز گلدی آداخلی دویون ائتدی تازه گلینین چیلله پایی دا یادا دوشدو
شیرین گئجه دی خاطیره لی یاخشی زاماندی دونیا ده ییشن اقریبالاردا یادا دوشدو
ماهنی اوخونور دینله ییریک شن هاوالاری بایرام گونونون شاد هاواسی دا یادا دوشدو
یلداگئجه سی ماهنادی ائل – طایفا بیر اولسون ائل – طایفا دان آیری عولما دا یادا دوشدو
چیلله گئجه سی شئعرین اوخور دویغولو شاعیر موتلو دن علاوه شوعرا دا یادا دوشدو
اسفندیار سپهری (موتلو) پازی: سولدوزدا چوغوندوره دییلیر. اورمودا چوکوندور دییلیر. جوز: جه ویز - گیرده کان - گوز [ سه شنبه بیست و دوم آذر 1390 ] [ 22:52 ] [ یاشار جعفر اوغلو ]
تانرینین آدی و یادیلا ایمام حوسئین جنابلارینا بیر روضه عاشورا گئجه سی ایدی شهر بیر پارچا عزا و ائو بیر پارچا سوسلوق و درد … اؤز اؤزومه دئدیم بو دردین یالنیزلیغیندا و بوعزالی گئجه ده اوتوروم و اؤزومله عزادارلیق ائدیم . مه یه یالنیزجادا عزادارلیق ائتمک اولمازمی؟ اوتوردوم و بیر روضه اؤز اوره ییمه یازدیم: … گؤزومون اؤنونو گؤز یاشی پرده کیمی توتموشدو… تکرارلی و عئینی زاماندا خاطیره لی دیجله و فرات های – کویونده - بو ایکی دوشمان کی یئددی مین ایل قدم به قدم تاریخ له بیرسفرده اولوبلار – یئنی چیغریلتی برپادیر. ایستی و یاندیریجی چؤلو گؤرورم، اوتانجیل رنگده بیر سمانی ، قارا و ان یاندیریجی گونش ، اود تؤکن هاوانی ، و بیر رمل لی دنیزی کی اوفوقدان اوفوقا سره له نیبدیر و دالغالی آرخ کی یئنی بیر قانلا جوشلانیر و قدم به قدم دومدورو فرات لا یول بیردی. و شمشیرلرکی هر طرفدن دیشاری چیخاریلیبدی و اوخلار هر بیر یئردن بوراخیلیب و قورولان چادیرلار اودا چکیلیب و ناکیشی لر تالان ائتمک فیکرینده. کینه لر اودلانیبلار و دوشمن لر هر یئرده پوسقون و دوست دا دوشمنین اویونجاغی . هاوا ان یانیقلی بیرحالدا و آغیر بیر قوربت ، دوشمن حاصیلسیز شوراکند کیمی ، چینقیل لار داغ ، سوسوزولوق جان یاندیران ، و دیجله قارا ، قودورموش ، یوروشجل و فرات قیرمیزی ، کین و اؤلوم سرحدّی ایشغال آلتیندا « دوشمانچالیق جریاندا» و …. قورخورام اونون گوجلو و بؤیوک چؤهره سینه باخام .اوکس کی بیر بئله بیلمه مزلیق و پیسلیغین قورابانیدی. آیاق لارینا باخیرام کی حه له ده ایستیقامت له و دؤزومله دایانیب و بو بدن یوزلرجه ضربه نی آیاغا قالدیریب. قورخاخ و هیجاندان تیتررکن گؤزلریمی چکمه لر و رداسی نین اته ییندن اوسته آپاریرام ، ایندی ایسه ایکی دوشموش قوللارینا ، بیر اودوزان اینسان کیمی شمشیر الیندن دوشور. آمما سینیرلی پنجه لری حاصیلسیز تعصّوب له چالیشیر شمشیری ساخلاسین … شمشیرین دسته سینده قانلی بارماقلاری نین ایزی وارکی داخی … …. دوشدو! و او بیری الی ، حه له ده تکلیف سیز! گؤزلریمی داهادا اوسته قالدیریرام : بیر بویون کی عئینی « حرا» زیروه سی کیمی ، اوجا داغدان یوکسه لیب و تاریخین امان سیز ضربه لری اونا توخانیب،دهشتجه گوبسه نیب و یارالی دیر، آمما اییلمه ییب. باخیشلاریمی شئریم شئریم سوزولن قاندان داها دا اوسته قالدیریرام بیردن بیره توستو و دومان چتری ! بیر توزجیل ، دولو و قارا بولود کیمی کی ائله بیل بیر پاتلاییشدان گؤیو بوسبوتون آلیب و داخی هئچ....! اوره ییمی بیرپنجه ،وحشی سوییه ده اؤزچنگه سینده سیخیر.غیظ له بیرایتی دیشلرجییه ریمی دیشله ییر ، ایچه ریمدن یاندیران و ایستی توستو باشیما ساری یوکسلیر ، گؤزلریمی یاندیریر. اوتانماق و ایشکنجه منی آزارلاندیریر کی: « وارام » کی «یاشاییرام» . بو قدر « بیچارا اولماق » و « اولماق » یوکو بو قدر آغیر! گؤز یاشی آمان وئرمیر . گؤره بیلمیرم. گؤزومون اؤنونو یاش پرده سی توتوبدور. اؤنومده هر شئی بیر موبهم لی قان و توزجیل شکیلده تیتره ییر.آمما حه له ده بیر سئوگی و اوتانجیل گؤزله مک له باخیرام. بو توستو و بولودون قلبینده بیر شبح گؤرورم. بیر قارالتی و سوسقون چؤهره. پئرومته نین چؤهره سی ، اساطیری رب النّوع کی ایندی گرچکله شیب دیر. هیجان و ذؤوق ،گؤزلریمین یاشینی قورودور. موبهم توستو کی منیم گؤزیاشیمدا تیتره ییر ، قیراغا گئدیر ، آیدینلاشیر و چؤهره سی نین قیریشلاری گؤرونور. عجبا اونون ایلاهی سیماسینی گؤره جه یم می؟ نه قدربئله بیر دردی گؤرمک دؤزومسوزلوک دور ؟ بیر بئله اولای بیر چؤهره ده ؟ بیر چؤهره کی اینسانین بوسبوتون آزارلیغینی اونون مظلوم یاشایئشی نین کئچمیشینده حئکایت ائدیر. بیر چؤهره کی .... نه دئییم؟.... ایسلام موفتیسی ، اونو تانری دینیندن چیخان بیر یابانچی و محمد(ص) یولونو پوزان آدیلا محکوم ائدیب و اونون اؤلومونه فتوا وئریبدی! **************************** اطرافیندا جانی ایستی اؤلولردن سووای - کی اؤز قانلارینین ایچینده یاتیبلار- هئچ بیر کس اوندان دیفاع ائتمیر. یالنیز و آزارلی پیکره کیمی قانین دالغاسیندان چؤلده باش قالدیریب و حه له تاریخ اوغروندا دوروبدور. نه قاییدیر، کی: هارا ؟ نه قاباغا گئدیر، کی : نئجه؟ نه ساواشیر، کی : نه یی نن؟ نه دانیشیر، کی : کیمنن؟ و نه اوتورور کی هئچ واخت! آیاغ اوسته دوروب و تام چالیشیغی بو کی .... دوشمه سین. بیر توخماق کیمی دوست – دوشمان ضربه لرینین آلتیندا ، تام یئرلرین اوش جل تانریلارین چککوشو آلتیندا ( خسرو ، دهقان ، موبد – گوج ، آلتون ، ایکی اوزدولوق – سیاست ، ایقتیصاد ، مذهب ) ، تاریخ بویو ، آدم نن تا .... اؤزونه دک! چؤهره سینه یئنه ده گؤزومو تیکیرم . سوسقون و تانیش . بیر باخیش کی غمدن سونرا هئچ نه یوخ. حه له ده سوسوب . دؤزه بیلمیرم . چوخ آغیردی. « اولماغیمین» بوتووون اؤزونده سیندیریر و تیکه تیکه ائدیر. قاچیرام! آمما قورخورام یالنیز قالام .یالنیزاؤزومدن ،اؤزومو دؤزمکده ان اوتانجیل و ایشکنجه لی دیر. کوچه یه باخیرام تا باشقا اینسانلارین قارانلیغیندا ایتم. شه هر های – کویونده اؤزومو دانلاماق سسینی دویمویام. خالقلار فازلا چوخالیبلار و شه هر قالابالیقلی و قاینارکن آغلاییر. چیغیر- باغیر سسلر، حزین حزین سئزلاماقلار ، الده کی عَلَم لر ، زنجیرلر و تیغه لر کی اینسانلار اونلاری اوز ، باش و بؤیورلرینه چالیرلار و اوزون ردا گئیمیش کیشی لر و ... .... یالنیزجا و دیدرگین دوشرکن هر طرفه قاچیرام. بونون یاخاسی نین گوشه سیندن یاپیشیرام ، اونون رداسی نین اته ییندن یاپیشیرام ، سوروشورام . تام ایسته ییمله سوروشورام ، گؤز یاشی و درد ایچینده بوغولورام. - بو کیشی کیم دیر؟ - دردی ندیر؟ بو یالنیز اینسان تاریخینین واریثی ، زامانین آل بایراغی نین واریثی ، بس نییه یالنیز؟ - نه ائدیب کی؟ - نه چکیب کی؟ منه سؤیله یین : آدی ندیر؟ هئچ بیر کس سوروما جاواب وئرمیر! گؤزومون اؤنونو گؤز یاشی پرده کیمی توتوبدور.... [ جمعه یازدهم آذر 1390 ] [ 21:45 ] [ یاشار جعفر اوغلو ]
«شهامت» درگی سی نین حؤرمتلی سوروملو مودیری سایین صادق ظاهری جنابلاری سالام و سایقیلا اؤنجه دن دیه رلی « شهامت » درگی نین آذربایجانین درگی لر عائیله سینه قاووشماسینی سیزه ، آذربایجان خالقینا و اؤزللیک له کولتور بسلی ین و ادب سئوراورمو خالقینا تبریک ائدیرم و موتلویام بئلنچی بیر کولتورل درگی لر و سسلر نه قدرده یایئملانیرسا ، یئنه ده یئری واردیر نییه کی خالقیمیزین اوقدر چتین لیک لری و حیرمانلاری یوکسکدیر کی یالنیزقلم و کاغیذلار واسیطه سیله دئییلیب و یازیلماسی و سوروملو لارین قولاقلارینا یئتیرمک گرکدیر. « شهامت» درگی سیله ائله اویغونلو گونده یانی قورابیشیرن(مرداد) آیینین 17 – سینده موخبیرلر و ژورنالیست لر گونونده آخشام چاغی ، ایرشاد و کولتور ایداره سینین حه یه طینده حؤرمتلی گوجلو قلمداش عبدی خانیملاری نین واسیطه سیله تانیش اولدوم ( البته ایکینجی نومره سی له) و ایلک دفه بو اؤنملی و دیه رلی گونده بوخالق درگی سین گؤروب و ماراقلاندیم. درگی نین یوکسک دوروموندان چوخ یاخشی بللی دیرکی اونون چالیشانلاری،یازارلاری ، سوروملو مودیری ، موخبیرلری و باشقا فاعالیّت گؤسترن اینسانلاریوخاری بیلگی،قزئته چیلیق معلوماتا،یوکسک ذؤوق و ادبه مالیکدیرلرو البته بونلارین هامیسی بیزیم خالقیمیزین شهامت و شوجاعتیندن ایره لی گلیر.چوخ آزاراق گؤرسنیبدیر کی بیر درگی ایلک سایلاریندا بئله یوکسک دوروما مالیک اولسون. سونوچ دا بیر داها بو ماراق لی و اوره یه یاتان آذربایجان درگی سین، آذربایجان و اؤزل لیک له اورمو شهرینین ادب سئور خالق اوزه رینه گؤز آچیب ایشیقلانماسینی قوتلاییب ، اولو تانریدان ، یئنی خالق سسینی دینلندیریلمک و مطبوعات ساحه سینده « شهامت» لی یئنی بیر تاریخی واراق آچدیقینیزا گؤره یوکسک سوییه ده باشاریلار و یاخشی چالیشیقلار دیله ییرم. قلمی نیز گوجلو ، یولونوز آچیق و کؤنلونوز خالق سئوگیسی له دولو اولسون. ممنونیّت له اسفندیار سپهری هفته لیک «فردای ما » درگی سینین یازارلارشوراسی نین باش کاتیبی [ چهارشنبه بیست و ششم مرداد 1390 ] [ 1:7 ] [ یاشار جعفر اوغلو ]
«یئنه گلدی رمضان خلق موسلمان اولاجاق»* نامازین قیلمایان اینسان نه ریاکار اولاجاق قارنینی دولدورار او یئریئمه لی لر تامام خلق ایچینده هامیدان عابید زاهید اولاجاق دسته مازسیز گله جک اولّی صفده دوراجاق پیش نامازدان دا قاباق آنلی مؤهورده اولاجاق صوبحودن آخشاماچن مردومه اوت قیسدیرار او باشینا قورآن آلیب احیادا توّاب اولاجاق یالان ایله کئچیریر هر گونوزون هم گئجه نی راماضان واختی گلیر صادیق کذّاب اولاجاق باشلارا بؤرک قویور بؤرکوده باشدان گؤتورور ائله کی گلدی اوروجلوق نئجه صوّاب اولاجاق عادی واختا قوواجاق یوخسوزو هم سائیلی او راماضان چاغدا آغا حاتم تایی اولاجاق موتلو * اوجامان تورک شاعیری اوستاد کریمی مراغه ای نین شعرینین ایلک بیتینین ایلک میصرعی [ چهارشنبه بیست و ششم مرداد 1390 ] [ 1:4 ] [ یاشار جعفر اوغلو ]
|
درباره وبلاگ  یاشار جعفر اوغلو (اسفندیارسپهری) اکینچیلیک مهندیسی دولت مامورو(کارمندی) دوغوم یئریم:سولدوز دوغوم تاریخی : 30/6/1346 یازیچی - کوچورن- قزئته چی اورمودا یایئلان فردای ما (صاباحیمیز)درگی سینین باش یازاری سولدوزدا یایئلان ارمغان آذربایجان و تپش قلم درگی لرین یازیچیلار شوراسی نین اویه سی(عضوو) چاپ اولان اثرلر: نه سایاغ اولسا (جاویدسالمان اوغلونون شعرلری) اوشاقلارا هدیه (شعرتوپلومو) تجزیه بورچالو (پارالانمیش بورچالی) قاراپاپاق ائلی نین تاریخی و کئچمیشینه بیر باخیش چاپا حاضیرلانمیش کیتابلار: یئدی عونوان ناغیل یئدی کیتابدا (اوشاق ساحه سینده) آذربایجان دیلی معلوماتی آذربایجان تاریخی و ان اونملی اوز وئرمیش حادیثه لر و اولایلاری تاریخ بویوندا فارسجا یازیلان (توقیف در مطبوعات و مطبوعات در توقیف از عهد ناصرالدین شاه تا دولت احمدی نژاد) تلفون نومرم: 09143400243 ایمیل: sepehri68@yahoo.com | |
| [ طراح قالب : پیچک ] [ Weblog Themes By : Pichak.net ] | ||